كن إيجابياً وحارب الفساد مثل هذا المواطن

هذه قصة قصها أحد الأشخاص على صفحة تواصل اجتماعي معروفة باسم " مصر الجديدة " ورواد هذه الصفحة تسمح لأصدقائها بسرد القصص الإيجابية أو السلبية التي مروا به . 

ونعرض هنا قصة أحد رواد هذه الصفحة كما جاءت على لسانه في رفض استغلاله وإصراره على تمسكه بحقه والمنشورة بتاريخ 13 من سبتمبر في تمام الساعة 5.11 مساءً .

وإليكم القصة كما رواها : 

أول يوم العيد رحت أنا والأسرة كافيه " كارليتو " Carlito Café " ( كارتلو كافيه ) على السريع ركنت العربية ووقفت على الباب قالوا مفيش مكان وفي ويتينج استنيت حوالي نص ساعة وبعدين دخلنا ، الغريبة اني لقيت اكتر من ترابيزة فاضية ومع ذلك الناس واقفة ويتينج!!

طلبنا أوردر واللي بياخد الأوردر أما لقى الأوردر مش كبير قالي كدا في مينيمم تشارج 50 جنيه للفرد قلتله مبدفعش مينيمم ضحك وسابني ومشي الأوردر جه وخلصنا قلت أطلب بيتزا وآخدها تيك أواي قالي هتاخد ساعة ونص!! قلتله لا خلاص هاتلي الشيك

الشيك جه وفيه حسابنا 56 جنيه دا اللي احنا طلبناه وفيه زيادة 100 جنيه خدمة ومينيمم تشارج معلومة للي ميعرفش مش من حق اي مكان يفرض مينيمم تشارج إلا لو كان منشأة سياحية وعضو غرفة السياحة ودي بتبقى لوحة بارزة وواضحة في أي مكان سياحي وكمان لو كان سياحي عشان يفرض مينيمم لازم يوضح للعملاء كتابة في  مكان واضح أنه فيه مينيمم تشارج عشان الناس تعرف قبل ما تدخل .

روحت للكاشير سألته المكان دا كام نجمة ؟ قالي لا مفيش نجوم قلتله يعني مش سياحي قالي لا اعتبرني ولا نجمة قلتله خلاص يبقى حضرتك انا مش هدفع غير اللي طلبته بس والخدمة بس مش هدفع مينيمم قالي ما كل الناس دافعة هو انت احسن منهم كلهم قلتله الناس بتتحرج او مش عارفة حقها دي مشكلتهم بس دا انا حقي ومش هدفع جابلي مدير والمدير قالي لا يا فندم احنا مكان سياحي قلتله طيب وريني حضرتك ترخيص السياحة قالي انت مش شرطة سياحة ومش من حقك تشوفه قلتله مع انه المفروض يبقى متعلق وواضح بس أوكي خلاص يا أفندم أنا هدفع ال 150  وهدفع ألف جنيه كمان لو عايز بس بعد إذنك طلعلي فاتورة ضريبية عليها اسم وعنوان المكان ورقم السجل الضريبي بالمبلغ اللي عايزني أدفعه وانا هدفع على طول .
معلومة بردو للي مش عارف أي مستهلك في أي مكان تجاري مهما كان من حقه يطلب فاتورة ضريبية وبيتم إصدارها عند الطلب ورفض إصدار الفاتورة يعتبر جريمة وتهرب ضريبي
رفض وقالي مش من حقك تاخد فاتورة انت مش شرطة قلتله يا فندم شرطة ايه اي زبون من حقه يطلب فاتورة قالي معندناش فواتير قلتله خلاص انا مش دافع حضرتك اطلبلي الشرطة تيجي تدفعني يا إما هدفع إللي طلبته بس وهمشي قالي لا مش هطلب حاجة وادفع أحسن أنت معاك حريم عشان ميتبهدلوش .

وبعدها قالي أو متدفعش خالص وامشي ومش هدخلك هنا تاني وبعدين سلم الشبك لواحد من اللي شغالين وقاله حصل الشبك كامل وابقى اجي والاقي الشيك متدفعش .
بعد ساعة الا ربع الشرطة مجتش كلمتهم تاني وقلتلهم اني محجوز في المكان ومانعني امشي قالولي هنستعجلهم وبعدها ب 5 دقايق جات 3 عربيات شرطة وعساكر بآلي وسرينة ووقفوا قدام الكافيه وكل الناس بدأت تاخد بالها مدير المطعم طلب من الشرطة تقف بعيد عن باب المطعم ومشيوا من قدام الباب جه الظابط حكيتله الموضوع وقعد يقنعني انه موضوع تافه مع اني شرحتله انه مش موضوع فلوس وان دا حقي غير اني اتهنت واتحبست جوا واتهددت باهلي وهو بردو مصر انه تافه اصريت اني احرر محضر وهنا بقا بدأ موضوع تاني .

بغض النظر عن الحرس اللي حاطهم فوق دماغنا كل ما اقوم من مكان يقف في قفايا عشان مهربش بالحساب قام مشي طلعت انا حساب اللي طلبته عشان ادفع وامشي رفضوا يمشوني من المكان طلبت واحد صاحبي يجي يروح أهلي بعربيته بعد ما قالي انت معاك حريم والكلام دا لحد ما اشوف اخرتها معاهم وطلبت النجدة وبلغتهم بالموضوع وقالولي هنبعت دورية .

صاحبي جه وهو ماشي مع أهلي العاملين في المكان كلهم اتلموا عليهم وقالوله مش هتمشوا الا ما تدفعوا الحساب قلهم ان انا مش همشي وانا هحاسبهم .

الظابط قالي انت شكلك فاضي قلتله ايوة أنا فاضي !!
الشرطة قعدت مش اقل من ساعتين كاملين واقفين في الشارع بيقنعوني معملش محضر قلتله مش هعمل محضر بس عايز فاتورة مدير المطعم المالي كان واقف ورفض يطلع فاتورة وكمان قطع الشيك قدام الظابط بس أنا صورته قبلها لحد في الآخر الظابط قالي هخليك متدفعش حساب خالص وهجبلك اللي شغالين كلهم يعتذروا لك وهتيجي تقعد بعد كدا براحتك وهديك رقمي ولو أي حد ضايقك كلمني وأنا هاجيلك !!! كل دا عشان بس معملش محضر !!!  بكل اللي اتعرض عليا دا أصريت اكتر اني اعمل محضر لاني عرفت اني على حق والا مكانوش يعملو كدا نشفت دماغي وقلت للظابط انه ميضيعش وقته ويلا نروح القسم في الوقت دا في كام أمين شرطة كلموني على جنب وقالولي دا حقك ولازم تعمل محضر وهما عايزين ينيموا الموضوع .
حتى لو وقتي هيضيع بس على الأقل هحاول أخد حقي ولو مجاش هبقى عملت اللي عليا .

رحت قسم الشرطة مع الدورية وعملت محضر بكل التفاصيل دي وبحبسي وتهديدي في المكان وبتوع كارليتو رفضو يجوا القسم عشان يقولوا أقوالهم وهيتبعتلهم المحضر نقطة شرطة قحافة رقم المحضر 8 ج 12/09/2016

وبعت شكوى لحماية المستهلك بخصوص المينيمم تشارج وسوء المعاملة ورفض اصدار فاتورة
-  هبعت شكوى لمصلحة الضرايب بخصوص رفض اصدار فاتورة ضريبية
-  هبعت شكوى للغرفة السياحية بخصوص فرض مينيمم تشارج لغير منشأة سياحية

-  هاخد رقم قضائي للمحضر وهطلب تحقيق نيابة

ياريت محدش يسيب حقه حتى لو شايف ان دا مبلغ صغير وعادي بس انت وغيرك بتتسرق خليك ايجابي وحارب الاستغلال واطلب حقك ودي صورة الشيك . 

الجمعة, سبتمبر 16, 2016