للشاعر / شهاب رضوان
الحلم مات ،،
والذكريات
لو كنت أقدر أحتويها
ماكانش نص العمر فات
ببكي ف سكات
بلعن سنين
وأكره حاجات
...............
أوقات بفكر ف البداية
وأسرح ساعات
برجع لحلم زمان حلمته
ألاقيه كابوس مليان أهات
آهة تسحب ألف غيرها
عيني مفتوحة لآخرها
نفسي أبطل أفتكرها
نفسي أمحي الذكريات
ويوم ما تجيني تستفسر
هرد وأقول
كان فيه ،،، ومات
................
خسران مفيش مكسب
ما الجرح أصله غويط
من حلمى جاي اسرق
الشخبطة ع الحيط
برسم حروف اسمك
حلمى اللى كان بيكى
سرقه الزمن ومفيش
وهان عليكى الورد
والفسحه ع الكورنيش
والفل ف كفوفك
من بياعين الفل
يا بياعين الفل ،،
ماتجوش هنا عندى
مصبوب ف كاسي خل
قطف الزمن وردى
عايش كما الميت
واهو عمر بيعدى
دا الحلم مات مقتول
ما تزودوش وجعى
يا بياعين الفل ،،
ماتجوش هنا عندى
..........
عٍندي اللي كان منها
أصبح ك داء فيا ..
ملعون بسهر الليل
مدمن دواه هيا ..
أنا كل ماقفل باب
ألقاها ف الشبابيك
والقاها في المرايات
والقاها ف عنيا
ازاي مشيتي خلاص
وأنا لسة وسط الناس
شايفك هناك جيا
...............
البوصله كات عاكسه
مع ذلك انا قربت
حبيت اعيش الحلم
وعشانك اتغربت
لكن لقيته كابوس
والعمر عدا وفات
دورت تانى عليه
لكنه سابنى ومات
الحلم مات
0 التعليقات:
إرسال تعليق